ఇండియన్ క్రికెట్లో సెలక్షన్లు కొన్నిసార్లు ఎంతో ఆశ్చర్యం కలిగిస్తుంటాయి. కొందరు ఆటగాళ్లపై అనూహ్యంగా వేటు పడుతుంటుంది. కొందరు క్రికెటర్లకు అవకాశం దక్కుతుంటుంది. టీమ్ సెలక్షన్ విషయంలో అభిమానులు కూడా ఒక్కో సమయంలో ఒక్క రకమైన ఎమోషన్తో మాట్లాడుతుంటారు. ఒకసారి ఒక ఆటగాడిని ఆకాశానికెత్తేస్తారు. కొన్ని మ్యాచ్లు ఫెయిలవగానే అదే ఆటగాడిని ఒక్కసారిగా కింద పడేస్తుంటారు. ఇప్పుడు సంజు శాంసన్ విషయంలో ఇదే జరుగుతోంది.
ఈ ఏడాది ఆరంభంలో భారత జట్టు టీ20 ప్రపంచకప్ గెలిచిందంటే అందుకు ప్రధాన కారణం సంజు శాంసన్ (Sanju Samson)అనే విషయంలో భిన్నాభిప్రాయాలు లేవు. టోర్నీ ఆరంభ దశలో అతడికి భారత తుది జట్టులో చోటు లేదు. కానీ లీగ్ దశ చివర్లో అవకాశం దక్కితే అద్భుతంగా రాణించాడు. వెస్టిండీస్తో చావో రేవో అనదగ్గ మ్యాచ్లో భారత్ భారీ లక్ష్యాన్ని ఛేదించి సెమీస్ చేరిందంటే అందుకు ప్రధాన కారణం.. సంజు ఆడిన 97 పరుగుల అజేయ ఇన్నింగ్సే. తర్వాత సెమీస్లో ఇంగ్లాండ్పై 89, ఫైనల్లో న్యూజిలాండ్పై 89 పరుగులతో జట్టుకు కప్పు (T20 World Cup 2026) అందించాడు. ఆ సమయంలో సంజును అభిమానులు వేనోళ్ల పొగిడారు. అంతకుముందు తుది జట్టులోకి అతణ్ని తీసుకోనందుకు టీమ్ మేనేజ్మెంట్ను తిట్టారు. జట్టు కూడా అతణ్ని నెత్తిన పెట్టుకుంది. కట్ చేస్తే.. ప్రపంచకప్ తర్వాత భారత్ ఆడిన నాలుగో టీ20కి సంజు తుది జట్టులో లేడు.
ఐపీఎల్ విరామం తర్వాత అంతర్జాతీయ క్రికెట్ను ఆరంభిస్తూ గత నెలలో యూకే పర్యటనకు వెళ్లింది టీమ్ఇండియా (Team India). అక్కడ ఐర్లాండ్పై రెండు టీ20ల్లో, ఆపై ఇంగ్లాండ్తో వర్షం వల్ల రద్దయిన తొలి టీ20లో సంజు విఫలమయ్యాడు. వరుసగా మూడు ఇన్నింగ్స్ల్లో అతడి స్కోర్లు.. 5, 0, 1. వరుసగా కొన్ని మ్యాచ్ల్లో చెలరేగడం.. తర్వాత వరుసగా విఫలమవడం సంజుకు ఎప్పుడూ ఉన్న బలహీనతే. రెండేళ్లకు ముందు కొన్ని రోజుల వ్యవధిలో.. ఐదు మ్యాచ్ల్లో మూడు శతకాలు బాదిన ఘనత సంజు సొంతం. కానీ తర్వాత నిలకడ తప్పాడు. తుది జట్టులోకి వస్తూ పోతూ ఉన్న అతడిని.. టీ20 ప్రపంచకప్ ఆరంభ దశలో పక్కన పెట్టారు. కానీ టోర్నీ చివర్లో తుది జట్టులోకి వచ్చి అసాధారణ ప్రదర్శన చేశాడు. ప్రపంచకప్ హీరో అయ్యాడు. కానీ ఇప్పుడు షరా మామూలే.
కొత్త హీరో రాగానే..
భారత క్రికెట్లో ఒక కొత్త హీరో ఎవరైనా కనిపించగానే అతడి వైపు ఆకర్షితులై ఆకాశానికి ఎత్తేసే అభిమానులు.. అప్పటిదాకా భుజాల మీద మోసిన ఆటగాడిని విస్మరిస్తుంటారు. ఐపీఎల్లో హీరోగా అవతరించిన 15 ఏళ్ల వైభవ్ సూర్యవంశీ (vaibhav suryavanshi) ఇటు టీమ్ మేనేజ్మెంట్, అటు అభిమానుల దృష్టిని ఆకర్షించాడు. అతణ్ని తుది జట్టులోకి తీసుకోవాలని సోషల్ మీడియాలో గట్టిగా డిమాండ్లు వినిపించాయి. ఐర్లాండ్పై రెండు మ్యాచ్ల్లో, తర్వాత ఇంగ్లాండ్తో తొలి టీ20లో వైభవ్ను ఆడించనందుకు సోషల్ మీడియాలో తీవ్ర విమర్శలు తప్పలేదు. ఐతే వైభవ్ను ఆడించాలంటే ఓపెనింగ్లో ఒకరిపై వేటు వేయాలి. ఆ వేటు సంజు మీదే పడింది. అభిషేక్ ఫామ్లో ఉండడంతో తప్పించుకున్నాడు. ఇప్పుడు సంజుకు జరిగిన అన్యాయం గురించి చర్చ జరుగుతోంది.
వరుసగా మూడు మేటి ఇన్నింగ్స్లు ఆడి ఇండియాకు ప్రపంచకప్ అందించిన ఆటగాడు ఇప్పుడు.. మూడు ఇన్నింగ్స్ల్లో ఫెయిలవగానే తప్పించడం ఏం న్యాయమనే ప్రశ్నలు తలెత్తుతున్నాయి. ఐతే సంజును తాత్కాలికంగా తుది జట్టుకు దూరం పెట్టినా ఓకే కానీ.. ఈ నెల చివర్లో జింబాబ్వేతో జరిగే టీ20 సిరీస్కు మొత్తంగా జట్టు నుంచి తప్పించడమే ఆశ్చర్యం కలిగిస్తోంది. ఇది విశ్రాంతా.. వేటా అనే విషయంలో కొంత సందేహాలు ఉన్నప్పటికీ.. ఇటీవలి పరిణామాలు చూస్తుంటే వేటు లాగే కనిపిస్తోంది. ఇంగ్లాండ్తో రెండో టీ20కి తనను పక్కన సమయంలో గ్రౌండ్లో కోచ్ గంభీర్తో సంజు వాదిస్తూ కనిపించాడు. దాని ఫలితంగానే ఇప్పుడు జింబాబ్వే సిరీస్కు తనపై వేటు వేశారా అన్న సందేహాలు కలుగుతున్నాయి. ప్రపంచకప్ టైంలో సంజును ఆకాశానికెత్తిన అభిమానులు కూడా ఇప్పుడు వైభవ్ రూపంలో కొత్త హీరో కనిపించేసరికి జట్టుకు ఈ కేరళ బ్యాటర్ అందించిన గొప్ప విజయాలను మరిచిపోవడం విడ్డూరం.
– ఈనాడు క్రీడా విభాగం
