ఇంటర్నెట్డెస్క్: పశ్చిమాసియాలో మళ్లీ ఉద్రిక్తతలు తీవ్రరూపం దాల్చాయి. దాంతో మార్కెట్లకు చమురు సెగ తగులుతోంది. ఒకవైపు ముడిచమురు ధరలు పెరుగుతుంటే.. లోహాలకు మాత్రం డిమాండ్ తగ్గుతోంది. దీంతో బంగారం, వెండి ధరలు దిగొస్తున్నాయి (Gold Silver Rate Today).
హైదరాబాద్ మార్కెట్లో 24 క్యారెట్ల 10 గ్రాముల మేలిమి బంగారం (Gold) రూ.1.55 లక్షలు పలుకుతోంది. నిన్న ఆ ధర రూ.1.57 లక్షలుగా ఉంది. దీని ధర రూ.రెండు వేల వరకు దిగొచ్చింది. మరోవైపు, కేజీ వెండి రూ.2,37,486 నుంచి రూ. 2,34,478కు పడిపోయింది. ఒక కేజీకి రూ.మూడువేల మేర ధర తగ్గింది. గోల్డ్ ఫ్యూచర్స్ 10 గ్రాముల బంగారం ధర రూ.1,50,143గా ఉంది. వెండి ఫ్యూచర్స్ కేజీకి రూ.2,32,625గా ట్రేడవుతోంది. స్పాట్ గోల్డ్ 4307డాలర్లుగా ఉండగా.. స్పాట్ సిల్వర్ 63.79 డాలర్లు పలుకుతోంది.
మామూలుగా పెళ్లిళ్లు, శుభకార్యాల సమయంలో బంగారం (Gold) ధర పెరుగుతుంటుంది. అలాగే పెట్టుబడికి సాధనం. మార్కెట్లు అస్థిరతలకు గురైన సమయంలో మదుపర్లు పుత్తడిలో పెట్టుబడులనే సురక్షితమని భావిస్తుంటారు. కానీ పశ్చిమాసియా ఉద్రిక్తతల నేపథ్యంలో.. బంగారం, వెండి ధరల విషయంలో రివర్స్ ట్రెండ్ కనిపిస్తోంది. బంగారం, వెండి వంటి విలువైన లోహాల ధరలు అంతర్జాతీయ విపణికి అనుగుణంగా మారుతుంటాయి.
