ദുരിതമൊഴിയുന്നു…; മഴ കുറഞ്ഞു; നദികളിലെ ജലനിരപ്പ് താഴ്ന്നു തുടങ്ങി | Rain | Flood | Manorama Online News | Manorama News

ചെങ്ങന്നൂർ ∙ വെള്ളപ്പൊക്കഭീഷണി ഒഴിഞ്ഞതോടെ താലൂക്കിൽ പകുതിയോളം ക്യാംപുകൾ പിരിച്ചുവിട്ടു. 21 ക്യാംപുകളിലായി 2452 പേർ മാത്രമാണ് ഇപ്പോൾ കഴിയുന്നത്. തിരുവൻവണ്ടൂരിലെയും പാണ്ടനാട്ടിലെയും ഉൾപ്രദേശങ്ങളിൽ ഇപ്പോഴും വെള്ളം പൂർണമായും ഇറങ്ങിയിട്ടില്ല. തിരുവൻവണ്ടൂർ പഞ്ചായത്തിലെ ഒന്നൊഴികെ മറ്റു ക്യാംപുകൾ പിരിച്ചുവിട്ടു. ഇരമല്ലിക്കര, നന്നാട് ഭാഗങ്ങളിലെ താമസക്കാരാണ് ഇരമല്ലിക്കര ശ്രീഅയ്യപ്പ കോളജിലെ ക്യാംപിൽ കഴിയുന്നത്. മറ്റു പ്രദേശങ്ങളിൽ വീടുകളുടെ ശുചീകരണം പൂർത്തിയാക്കിയവർ ക്യാംപുകളിൽ നിന്നു വീടുകളിലേക്കു മടങ്ങി. പ്രവർത്തനം അവസാനിപ്പിച്ച ചില ക്യാംപുകൾ താമസക്കാരും മറ്റു ചിലവ സന്നദ്ധപ്രവർത്തകരും ശുചീകരിച്ചു നൽകി.

മാന്നാർ ∙ മഴ കുറയുകയും നദികളിലെ ജലനിരപ്പ് താഴുകയും ചെയ്തതോടെ അപ്പർകുട്ടനാട്ടിലെ ദുരിതബാധിത മേഖലയിൽ നിന്നു വെള്ളമിറങ്ങിത്തുടങ്ങി. ബുധനൂർ പഞ്ചായത്തിൽ 23 കുടുംബങ്ങളിലെ 76 പേരെ മാറ്റി പാർപ്പിച്ച എണ്ണയ്ക്കാട് ലിറ്റിൽ ഫ്ലവർ ചെറുപുഷ്്പം സ്കൂളിലെ ക്യംപാണ് ഇന്നലെ നിർത്തിയത്. ബുധനൂർ, മാന്നാർ, ചെന്നിത്തല എന്നീ പഞ്ചായത്തുകളിലെ ശേഷിക്കുന്ന മുഴുവൻ ക്യാംപുകളും ഇന്നലെയും തുടർന്നു.

ദുരിതബാധിതർ ഇന്നലെയും വീടുകളിൽ എത്തി പരിശോധന നടത്തിയെങ്കിലും വെള്ളം പൂർണമായി ഇറങ്ങാത്തതിനാൽ തിരികെ പോകാനാവില്ലെന്ന് റവന്യു, പഞ്ചായത്ത് അധികൃതരെ അറിയിച്ചു. വെള്ളമിറങ്ങി തുടങ്ങിയെങ്കിലും വീടുകളിലൊന്നും ശുചീകരണ പ്രവർത്തനത്തിനു കഴിയാത്ത അവസ്ഥയാണ്. പൊതുവേ മലിനപ്പെട്ടു ദുർഗന്ധം വമിക്കുന്ന തരത്തിലാണ് വീടുകളുടെയും പുരയിടത്തിലെയും അവസ്ഥ. ശുചീകരിക്കുന്നതിനു നല്ല തുക ചെലവാക്കേണ്ട ഗതികേടിലുമാണ് അവർ. അധികൃതർ ശുചീകരണ സാമഗ്രികളെത്തിക്കണമെന്നാണ് ദുരിതബാധിതരുടെ ആവശ്യം.