Abhishek Sharma; IPL 2026 GT vs SRH LIVE Score Updates Shubman Gill Sai Sudharsan

સુદર્શને સિક્સ ફટકારી

ગુજરાત ટાઇટન્સે 13મી ઓવરમાં 10 રન મેળવ્યા. સાઈ સુદર્શને સાકિબ હુસૈનના સ્લોઅર બોલ પર શાનદાર સિક્સ ફટકારીને રનગતિ વધારી હતી.

તેણે પાછળનો ઘૂંટણ વાળીને બોલને મિડ-ઓફની ઉપરથી સ્ટેન્ડ્સમાં પહોંચાડ્યો હતો. ઓવર પૂરી થઈ ત્યાં સુધીમાં સુદર્શન 37 બોલમાં 48 રન બનાવીને અણનમ રહ્યો અને પોતાની અર્ધસદીની નજીક પહોંચી ગયો. બીજી તરફ, વોશિંગ્ટન સુંદરે પણ સ્ટ્રાઈક રોટેટ કરીને ભાગીદારી આગળ વધારી.

શિવાંગે માત્ર 6 રન આપ્યા

હૈદરાબાદના સ્પિનર શિવાંગ કુમારે પોતાની પ્રથમ ઓવરમાં ગુજરાત ટાઇટન્સના બેટર્સને સરખી રીતે રમવા દીધા નહીં. તેણે માત્ર 6 રન ખર્ચ્યા. સાઈ સુદર્શન અને વોશિંગ્ટન સુંદરે મોટાભાગના બોલ પર સિંગલ લઈને સ્ટ્રાઈક રોટેટ કરી. ઓવરમાં બે વાઈડ પણ આવ્યા, પરંતુ શિવાંગે ગુગલી અને ટાઈટ લાઈનથી રનગતિ પર અંકુશ જાળવી રાખ્યો. 12 ઓવર પછી ગુજરાતનો સ્કોર 84/3 રહ્યો.

કમિન્સે સિંધુની વિકેટ લીધી

સનરાઈઝર્સના કેપ્ટન પેટ કમિન્સે ગુજરાતને ત્રીજો ઝટકો આપ્યો. ફુલ લેન્થ બોલ પર નિશાંત સિંધુ મોટો શૉટ રમવા ગયા, પરંતુ ધીમી પીચ પર ટાઈમિંગ યોગ્ય રીતે બેઠું નહીં. બોલ સીધો લોંગ-ઓફ પર ઊભેલા હેનરિક ક્લાસેનના હાથમાં ગયો. સિંધુ 14 બોલમાં 22 રન બનાવીને આઉટ થયો. તેણે પોતાની ટૂંકી પણ ઝડપી ઇનિંગ્સમાં 3 ચોગ્ગા અને 1 સિક્સર ફટકારી.

સુદર્શને મલિંગાના પ્રથમ બોલ પર ચોગ્ગો ફટકાર્યો

ગુજરાતે આઠમી ઓવરમાં 9 રન જોડ્યા. ઈશાન મલિંગાની ઓવરના પહેલા જ બોલે સાઈ સુદર્શને બેકવર્ડ પોઇન્ટ પાસેથી શાનદાર ચોગ્ગો ફટકાર્યો. જોકે, ત્યારબાદ મલિંગાએ કમબેક કરતા બેટર્નેસને મોટા શોટ રમવાની તક આપી નહોતી.

નિશાંત સિંધુ એક બોલ પર ડ્રાઈવ મારવાના પ્રયાસમાં બીટ પણ થયો હતો. 8 ઓવર પછી ગુજરાતનો સ્કોર 56/2 રહ્યો.

સિંધુએ બે બાઉન્ડરી ફટકારી

ગુજરાતે સાતમી ઓવરમાં 13 રન મેળવ્યા. નિશાંત સિંધુએ નીતિશ કુમાર રેડ્ડી પર એક છગ્ગો અને એક ચોગ્ગો ફટકાર્યો. તેણે શોર્ટ બોલ પર ડીપ મિડવિકેટની ઉપર શાનદાર સિક્સ લગાવી, જ્યારે ઓવરના છેલ્લા બોલ પર મિડ-ઓફની ઉપરથી ચોગ્ગો મેળવી લીધો. આ જ ઓવરમાં પ્રફુલ્લ હિંગેએ શાનદાર ફિલ્ડિંગ કરીને સંભવિત ચોગ્ગો બચાવ્યો હતો. 7 ઓવર પછી ગુજરાતનો સ્કોર 47/2 રહ્યો.

પાવરપ્લેમાં ગુજરાતની ધીમી શરૂઆત

હૈદરાબાદના બોલરોએ શરૂઆતની ઓવરોમાં ગુજરાત ટાઇટન્સને મોકળા મને રમવાની કોઈ તક આપી નહીં. પેટ કમિન્સે સચોટ બોલિંગ કરતા પોતાની બે ઓવરમાં માત્ર 8 રન આપ્યા.

શુભમન ગિલને નીતિશ કુમાર રેડ્ડીની ઓવરમાં લાઇફ લાઇન મળી હતી, પરંતુ તે તેનો ખાસ ફાયદો ઉઠાવી શક્યો નહીં અને પ્રફુલ્લના બોલ પર મિડ-ઓનમાં હેનરિક ક્લાસેનને કેચ આપી બેઠો.

ત્યારબાદ જોસ બટલર પણ વધુ સમય ટકી શક્યો નહીં. સનરાઈઝર્સે રિવ્યુ લઈને તેની વિકેટ મેળવી હતી. પાવરપ્લેમાં ગુજરાતે બે વિકેટ ગુમાવીને ધીમી શરૂઆત કરી.

રિવ્યુમાં બટલર આઉટ થયો

હૈદરાબાદને પાંચમી ઓવરમાં મોટી વિકેટ મળી. હિંગેનો બોલ લેગ સ્ટમ્પની બહાર જઈ રહ્યો હતો અને અમ્પાયરે તેને વાઈડ જાહેર કર્યો હતો, પરંતુ વિકેટકીપર ઈશાન કિશન અને બોલરે કેચની જોરદાર અપીલ કરી હતી.

હૈદરાબાદે તરત જ રિવ્યુ લીધો. રિપ્લેમાં સ્પષ્ટ દેખાયું કે જોસ બટલરે સ્કૂપ રમવાના પ્રયાસમાં એડ્જ વાગ્યો છે. ત્યારબાદ નિર્ણય બદલાયો અને બટલર 11 બોલમાં 7 રન બનાવીને આઉટ થયો.

કમિન્સે 4 રન આપ્યા

પેટ કમિન્સે પોતાની બીજી ઓવરમાં સચોટ બોલિંગ કરતા માત્ર 4 રન આપ્યા. તેણે સતત સારી લેન્થ પર બોલિંગ કરીને ગુજરાતના બેટર્સને મોકળા મને શોટ રમવાની કોઈ તક આપી નહીં.

જોસ બટલર એક બોલ પર મોટો શોટ મારવાના પ્રયાસમાં પૂરી રીતે બીટ થયો, જ્યારે સાઈ સુદર્શન પણ રન બનાવવા માટે સંઘર્ષ કરતો જોવા મળ્યો. 4 ઓવર પછી ગુજરાતનો સ્કોર 21/1 રહ્યો.

હિંગેએ ગિલને આઉટ કર્યો

હૈદરાબાદને ત્રીજી ઓવરમાં વિકેટ મળી. હિંગેના ફુલ લેન્થ બોલ પર શુભમન ગિલ ઓન ડ્રાઈવ રમવા ગયો, પરંતુ શૉટને યોગ્ય રીતે ટાઈમ કરી શક્યો નહીં.

બોલ સીધો મિડ-ઓન તરફ ગયો, જ્યાં હેનરિક ક્લાસને આગળની તરફ ડાઈવ લગાવીને શાનદાર લો કેચ પકડ્યો. ગિલ 7 બોલમાં 5 રન બનાવીને આઉટ થયા.

પેટ કમિન્સે પ્રથમ ઓવર ફેંકી

હૈદરાબાદના કેપ્ટન કમિન્સે પ્રથમ ઓવર ફેંકી હતી. તેણે માત્ર 5 રન આપ્યા. સાઈ સુદર્શને 2 રન લઈને ગુજરાતનું ખાતું ખોલાવ્યું.

હૈદરાબાદની પ્લેઇંગ-11

કમિન્સે બોલિંગ લીધી, ગિલ બોલ્યો- પીચ વધુ સારી દેખાઈ રહી છે

હૈદરાબાદના કેપ્ટન પેટ કમિન્સે ટોસ જીતીને પહેલા બોલિંગ કરવાનો નિર્ણય લીધો હતો. તેણે જણાવ્યું હતું કે ટીમે અગાઉ અહીં મેચ રમી નથી, તેથી શરૂઆતમાં બોલિંગ કરીને પીચને સમજવા ઇચ્છે છે.

કમિન્સને આશા છે કે બાદમાં બેટિંગ કરવી સરળ રહેશે. તેણે એમ પણ કહ્યું કે ટીમે આખી સીઝન દરમિયાન સારું પ્રદર્શન કર્યું છે અને ફાઈનલની રેસમાં ટકી રહેવા માટે આગામી ત્રણ મેચ ખૂબ જ મહત્ત્વની રહેશે. હૈદરાબાદે પ્લેઇંગ-11માં કોઈ ફેરફાર કર્યો નથી.

બીજી તરફ, ગુજરાત ટાઇટન્સના કેપ્ટન શુભમન ગિલે કહ્યું કે તેની ટીમ પણ પહેલા બોલિંગ કરવા ઇચ્છતી હતી. ગિલના જણાવ્યા પ્રમાણે, આ વિકેટ છેલ્લી કેટલીક મેચની સરખામણીમાં વધુ સારી દેખાઈ રહી છે.

તેણે ઉમેર્યું કે ટુર્નામેન્ટના આ તબક્કે સતત સારા નિર્ણયો અને સાચું એક્ઝિક્યુશન અત્યંત જરૂરી છે. ગુજરાતે પણ પોતાની ટીમમાં કોઈ ફેરફાર કર્યો નથી.

ગુજરાત લવન્ડર જર્સીમાં મેદાનમાં ઉતરી

ગુજરાત ટાઇટન્સ કેન્સર પ્રત્યે જાગૃતિ ફેલાવવા માટે ખાસ લવન્ડર રંગની જર્સી પહેરીને મેદાનમાં ઉતરી. ટીમ દર સીઝનમાં પોતાના એક હોમ ગ્રાઉન્ડ મેચમાં કેન્સર સર્વાઈવર્સ અને તેમના પરિવારોના સમર્થનમાં આ પહેલ કરે છે. લવન્ડર રંગ વિશ્વભરમાં કેન્સર સામેની લડાઈ અને જાગૃતિનું પ્રતીક માનવામાં આવે છે.

બન્ને ટીમ સાતમી વખત આમને-સામને ટકરાશે

બંને ટીમ વચ્ચે અત્યાર સુધી 6 મેચ રમાઈ છે. જેમાંથી GTએ 5 અને SRHએ 1 મેચ જીતી છે. ગયા સીઝનમાં બંને મેચ GTએ જીતી હતી. આ સીઝનમાં બંને ટીમ પહેલીવાર એકબીજા સામે ટકરાશે.

SRHએ 8 વખત 200નો આંકડો પાર કર્યો

સનરાઈઝર્સ હૈદરાબાદ આ સીઝનની સૌથી વિસ્ફોટક બેટિંગ યુનિટ બનીને ઉભરી છે. અભિષેક શર્મા, ટ્રેવિસ હેડ, ઈશાન કિશન અને હેનરિક ક્લાસેને બોલરો પર દબાણ બનાવ્યું છે. ટીમે 8 વખત 200 રનનો આંકડો પાર કર્યો છે, જેમાં મુંબઈ સામે 249 રનનો સ્કોર સામેલ છે. IPLના ટૉપ-10 બેટર્સમાં SRHના ત્રણ ખેલાડીઓ સામેલ છે. ક્લાસેન 11 મેચમાં 494 રન સાથે પ્રથમ, અભિષેક શર્મા બીજા અને ઈશાન કિશન આઠમાં નંબરે છે.

ગિલ અને સુદર્શનની જોડી GTની સૌથી મોટી તાકાત

શુભમન ગિલની કેપ્ટન્સી હેઠળની ગુજરાત ટાઇટન્સે ધીમી શરૂઆત બાદ શાનદાર લય મેળવી છે. રાજસ્થાન રોયલ્સ સામે 77 રનની જીતથી ટીમનો આત્મવિશ્વાસ વધ્યો છે.

બેટિંગમાં ગિલ અને સાઈ સુદર્શન ટીમની સૌથી મોટી તાકાત છે. જોસ બટલર અને વોશિંગ્ટન સુંદર મિડલ ઓર્ડરને મજબૂતી આપે છે. જોકે, ઉપરનો ક્રમ નિષ્ફળ જાય ત્યારે ફિનિશર્સ પર દબાણ આવી જાય છે. ગિલ ટીમના ટૉપ રન સ્કોરર છે, જેમણે 10 મેચમાં 160.41ના સ્ટ્રાઈક રેટથી 462 રન બનાવ્યા છે.

ગુજરાતની બોલિંગ પણ હવે વધુ શિસ્તબદ્ધ દેખાઈ રહી છે. મોહમ્મદ સિરાજ અને કાગીસો રબાડાની ઝડપ સાથે રાશિદ ખાનની સ્પિન વચ્ચેની ઓવરોમાં મેચ પલટી શકે છે. રબાડા 11 મેચમાં 18 વિકેટ ઝડપી ચૂક્યા છે.

કમિન્સના પરત ફરવાથી હૈદરાબાદનો મિજાજ બદલાયો

SRHની બોલિંગની કમાન પેટ કમિન્સના હાથમાં છે. ઈજાના કારણે શરૂઆતની મેચમાંથી બહાર રહ્યા બાદ તેના પરત ફરવાથી ટીમમાં નવી ઉર્જા આવી છે. તેના આવવાથી બોલિંગ એટેક વધુ આક્રમક અને સચોટ દેખાઈ રહ્યો છે. શ્રીલંકાના યુવા ફાસ્ટ બોલર ઈશાન મલિંગા આ સીઝનની નવી શોધ સાબિત થયો છે. તે 16 વિકેટ સાથે ટૉપ-5 વિકેટ લેનારાઓમાં સામેલ છે અને ટીમનો ટૉપ વિકેટ ટેકર પણ છે.

અમદાવાદની પીચ બેટર્સને મદદ કરશે

નરેન્દ્ર મોદી સ્ટેડિયમની પીચ બેટર્સને અનુકૂળ માનવામાં આવે છે. નવા બોલથી ફાસ્ટ બોલરોને પણ મદદ મળે છે. અહીં ટાર્ગેટને ચેઝ કરવો સરળ રહે છે, તેથી ટૉસ જીતનારી ટીમ પહેલા બોલિંગ કરવાનું પસંદ કરી શકે છે. અહીં અત્યાર સુધી 50 IPL મેચ રમાઈ છે, જેમાંથી 24 વખત પહેલા બેટિંગ કરનાર અને 25 વખત ચેઝ કરનાર ટીમ જીતી છે. એક મેચ ટાઈ રહી છે.

ગુજરાત ટાઇટન્સને સપોર્ટ કરવા માટે ફેન્સ ચણીયાચોળી પહેરીને આવી

ઉજ્જૈનની ફેન ખાસ અભિષેક માટે મિત્રો સાથે નરેન્દ્ર મોદી સ્ટેડિયમ પહોંચી

રાજકોટથી અભિષેક શર્માને સપોર્ટ કરવા માટે પોસ્ટર સાથે ફેન્સ આવ્યા

અભિષેક શર્માને જોવા ફેન સ્ટેડિયમ પહોંચી

અભિષેક શર્માને જોવા માટે ફેન્સ સ્ટેડિયમ પહોંચી ગયા છે. અનુષ્કાએ જણાવ્યું હતું કે, આજની મેચને લઈને ખૂબ ઉત્સાહ છે. ખાસ અભિષેક શર્માને જોવા માટે અને સપોર્ટ કરવા માટે આવ્યા છીએ. અભિષેક શર્મા જ આજે સારું પ્રદર્શન કરશે તેવું લાગે છે.

શુભમન ગિલને જોવા માટે ભોપાલથી ફેન્સ પહોંચ્યા

નરેન્દ્ર મોદી સ્ટેડિયમની બહાર ધીમે ધીમે ભીડ વધી રહી છે

અમદાવાદમાં 44 ડિગ્રી તાપમાન વચ્ચે ક્રિકેટ રસિકોમાં ઉત્સાહ

અમદાવાદના 44 ડિગ્રી તાપમાનમાં પણ ક્રિકેટ રસિકોમાં અનેરો ઉત્સાહ જોવા મળી રહ્યો છે. ગુજરાત ટાઇટન્સ અને સનરાઈઝર્સ હૈદરાબાદની મેચ જોવા મોટી સંખ્યામાં લોકો સ્ટેડિયમ પહોંચી રહ્યા છે.